Letlole la Inshorense ya ho Hloka Mosebetsi
Na Letlole la Inshorense ya ho Hloka Mosebetsi ke eng?
Mmuso o theile Letlole la Inshorense ya ho Hloka Mosebetsi bakeng sa ho thusa basebetsi bakeng sa nakwana ha ba felletswe ke mesebetsi ya bona, kapa ha ba sa kgone ho sebetsa ka baka la ho kula, la ho ya beleha le ho adoptha (ho itholla ngwana), hape le ho thusa bahlokomelwa ba mofu ya neng a kenya tjhelete letloleng.
Na tjhelete ya ho tsamaisa Letlole le ho lefella dithuso e fumanwa jwang?
Boramesebetsi mmoho le basebetsi ke bona ba thusang Letlole lena la Inshorense ya ho Hloka Mosebetsi ka ditjhelete, mme hona ba ho etsa ka ho kenya ditjhelete ho lona kgwedi le kgwedi. Mmuso ke ona o tshehetsang Letlole lena, mme o lebelletswe ho thusa Letlole le ka dinako tseo ho nang le dipalo tse hodimo tsa batho ba hlokang mesebetsi.
Na basebetsi bohle ba tshwanela ho kenya ditjhelete Letloleng la Inshorense ya ho Hloka Mosebetsi?
Basebetsi bohle ba sebetsang dihora tse ka hodimo ho tse 24 ka kgwedi ba tshwanela ho kenya tjhelete Letloleng. Ke tlolo ya molao ha boramesebetsi ba sa hule tjhelete ena meputsong ya basebetsi. Letlole ha jwale ha le ame basebetsi ba malapeng le ba mmuso. Dikgothaletso tsa hore ho akaretswe le basebetsi bana di lebelletswe ho phethahatswa ha morao.
Na ke tshwanela ho kenya tjhelete Letloleng le ha ke fumana moputso o hodimo?
Ee, basebetsi bohle, ntle le bao ba fumanang dikhomishene feela, ba tshwanela ho kenya tjhelete Letloleng lena ho sa natswe hore ba fumana bokae moputso. Letlole le beha palo e itseng eo ho tla fellwa ho yona, mme hona le ho etsa selemo le selemo. Basebetsi bohle ba fumanang moputso o ka hodimo ho oo ho fellwang ho ona ba tla kenya tjhelete ho fihlela ho eo ho itsweng ho tla fellwa ho yona, mme ha ba se ba sa sebetse ba tla fumana dithuso ka ho ya ka boemo boo ho itsweng ho tla fellwa ho bona. Hona ho bolela hore mosebetsi e mong le e mong ya leng boemong bo tlase ho ya fihla ho mookamedi wa khampani ba tshwanela ho kenya tjhelete Letloleng.
Na boramesebetsi bohle ba tshwanela ho kenya tjhelete Letloleng?
Boramesebetsi bohle ba hirang motho ofe kapa ofe e be ba mo neha moputso, e ka ba ka tjhelete kapa ka dimpho, ba tshwanela ho ingodisa Letloleng hang feela ho ba ba be boemong boo ba boramesebetsi. Ke boikarabelo ba ramosebetsi ho ngodisa kgwebo e be o hula ditjhelete tse tshwanetseng ho tswa meputsong ya basebetsi. Ha mohiri a ka hloleha ho etsa hona ho tla ba le dikotlo tse itseng tseo a ka fuwang tsona ka ho ya ka Molao wa Inshorense ya ho Hloka Mosebetsi, (Molao wa 63 wa 2001).
Ha ramosebetsi ofe kapa ofe a hana ho ingodisa le Letlole hape a sa batle le ho hula tjhelete eo, basebetsi ba eletswa hore ba iteanye le ba ofisi ya Lefapha la Mesebetsi. Hopolang, Letlole lena le theilwe ka morero wa ho sireletsa basebetsi.
Ho etswa boipiletso ba hore boramesebetsi ba latele ditlhophiso tsa Molao, ka ha Letlole lena le thusa batho bao ba kileng ba ba sebeletsa, mme ba seng ba se na letho la ho iphedisa ka ha ba felletswe ke mosebetsi.
Na ke eng ntho e nkuwang e le moputso?
Tjhelete yohle e fumanwang ho tswa ho ramosebetsi, e ka ba ka kontane kapa ka dimpho, ntle le khomishene, e nkuwa e le moputso, mme e tshwanelwa ho lefellwa tjhelete e yang Letloleng. Ditjhelete tse ding tsohle tse fumanwang ka thoko le tsona di nkuwa e le moputso, mme ho tshwanetse hore ho be le tjhelete e ntshiwang bakeng sa tsona e ya Letloleng. Mehlala ya ditjhelete tsena tse ka thoko ke e jwalo ka ditjhelete tsa maeto, tsa boithabiso le tsa dijo ekasitana le marobalo. Ha o batla ho tseba haholwanyane ka meputso o ka sheba shejulung ya 4 le shejulung ya 7 ya Molao wa Lekgetho la Meputso.
Ke bokae eo ke tshwanelang ho e kenya Letloleng?
Tjhelete e yang letloleng e tshwanelwang ho hulwa moputsong wa hao ke 1% ya palo yohle ya moputso wa hao, ho sa kenyelletswe khomishene. Ka hodima 1% e kengwang ke mosebetsi, ramosebetsi le yena o kenya 1% bakeng sa mosebetsi. Ka hoo, palo yohle e kengwang ke 2%..
Na ramosebetsi o kenya tjhelete ena jwang Letloleng, le teng neng?
Ramosebetsi o kenya tjhelete ena letloleng pele ho letsatsi la bosupa la kgwedi e nngwe le e nngwe. Bakeng sa ho lefa ditjhelete tsena tse yang Letloleng, boramesebetsi bao ba ingodositseng bakeng sa lekgetho ba tshwanela ho lefa ditjhelete tsena tse yang Letloleng ho ba Ditshebeletso tsa Lekgetho tsa Afrika Borwa. Boramesebetsi bao ba sa ingodisang bakeng sa lekgetho bona ba tshwanela ho lefa tjhelete eo ka ho toba Letloleng.
Na Letlole le tseba jwang hore tjhelete eo le e fumaneng ho hlaha ho mang?
Letlole le na le databeise ya boramesebetsi/basebetsi moo ho bolokwang dintlha tsohle tse mabapi le basebetsi. Ke boikarabelo ba ramosebetsi ho romela dintlha tse mabapi le basebetsi ba hae bohle letloleng hore ho tle ho lokiswe databeise kgwedi le kgwedi kapa le ha ho na le diphetoho tse itseng ho dintlha tse mabapi le basebetsi. Dintlha tseo tsa basebetsi di bolokwa databeising, mme ha motho a fellwa ke mosebetsi, Letlole le tla hlahloba kopo ya hae ntle le tikatiko. Ka hoo, ke ntho ya bohlokwa ho etsa bonnete ba hore ramosebetsi wa lona o romela dintlha tsa lona databeising ya Letlole.
Letlole le na le mekgwa e mengata e fapaneng bakeng sa boramesebetsi hore ba romele dintlha tse mabapi le basebetsi ba bona Letloleng, ho sa natswe boholo ba palo ya basebetsi. Hona ho kenyelletsa ho romela dintlha Letloleng ka dipampiri bakeng sa boramesebetsi bao ba banyenyane haholo ba se nang mekgwa ya ho lefa meputso ya elektroniki. Boramesebetsi bao ba nang le mekgwa ya ho lefa meputso ka elektroniki ba ka romela dintlha tsa bona databeising ka mokgwa wa elektroniki, ke hore ka FTP, e-mail, jwalo jwalo.
Dikarata tsa kgale tse bolou (karata ya UF 74) di tlilo nkelwa sebaka ke mokgwa ona o motjha wa elektroniki. Basebetsi bao ba ntseng ba na le dikarata tseo tse bolou ba tshwanela ho di kgutlisetsa ho boramesebetsi ya bona, mme ba kope hore dintlha tseo di romelwe Letloleng, di ilo kengwa databeising.
Na Letlole le tla tseba jwang hore le tshwanela ho ntefa bokae ha ke se ke sa sebetse?
Tekanyetso ya ho lefa dithuso e lenaneng le shejulung ya 3 ya Molao. Ntho ya bohlokwa eo o tshwanetseng ho e hopola ke ya hore dithuso di leshwa bakeng sa boholo ba matsatsi a 238 kapa bakeng sa palo ya matsatsi a krediti ao motho a a bokelletseng nakong ya dilemo tse 4, pele ho letsatsi la kopo.
Dikrediti di nehwa basebetsi ha ba ntse ba kenya tjhelete Letloleng. Dikrediti tsena di fumanwa ka tsela ena e latelang. Bakeng sa matsatsi a mang le a mang a 6 ao o a sebetsang o le motho ya kenyang tjhelete letloleng, o fumana krediti ya letsatsi le le leng. Hore o fumane dikrediti tse felletseng tsa matsatsi a 238 o tshwanetse hore o be o sebeditse bonyane dilemo tse 4.
Mosebetsi o nkuwa e le motho ya kentseng tjhelete Letloleng ho tloha letsatsing la ho qala la ho sebetsa ho fihlela letsatsing leo a fellwang ke mosebetsi oo wa hae. Nako ya nothisi eo motho a e sebetsang pele a emisa ho sebetsa, le yona e nkuwa jwalo ka nako e sebeditsweng.
Na tekanyetso ya dithuso e behwa jwang?
Tekanyetso ya ho lefa dithuso e shejulung ya 3 ya Molao wa Inshorense ya ho Hloka Mosebetsi. Ditekanyetso tsa dithuso di a fapana, mme di tloha ho 38% bakeng sa basebetsi bao ba fumanang meputso e hodimo ho ya ho 58% bakeng sa bao ba fumanang meputso e tlase.
Ho fapana le mokgwa o neng o sebediswa kgale, jwale Molao o entse ditlhophiso tsa hore dithuso tsena di leshwe ka ho ya ka sekala se theohang bakeng sa ho etsa bonnete ba hore basebetsi ba futsanehileng ba naha ba fumane palo e hodimo ya thuso bakeng sa mathata ao ba a baketsweng ke ho hloka mesebetsi.
Na ke mefuta efe ya dithuso eo Letlole le fanang ka tsona?
Letlole le fana ka mefuta e 5 ya dithuso:
Dithuso tsa ho hloka mosebetsi
Dithuso tsa ho kula
Dithuso tsa ho ya beleha
Dithuso tsa bahlokomelwa
Na ke efe melawana e sebediswang mabapi le dithuso tsena?
Batho bohle ba kenyang tjhelete letloleng ba bile ba na le dikrediti tse lekaneng ba tla leshwa dithuso tsa boholo ba matsatsi a 238, nakong efe kapa efe ya dilemo tse 4, ha ba sa sebetse. Bakeng sa dithuso tsa ho ya beleha, ke palo yohle ya matsatsi a 121 e tla lefellwang, ha ho na le dikrediti tse lekaneng.
Na ho tla etsahala eng ha moputso wa ka o ya o ntse o fetoha kgwedi le kgwedi, kapa beke le beke?
Ha moputso wa hao o fetoha kgwedi le kgwedi, kapa beke le beke, moo Molao o re palohare ya moputso wa dikgwedi tse 6 tse fetileng ke yona e tla sebediswa ho bala moputso wa hao.
Na ke neng moo motho ya neng a kenya tjhelete letloleng a iphumanang a sa lokela ho fumana dithuso?
Ha motho ya neng a kenya tjhelete letloleng a se a amohela tjhelete ya penshene ya Mmuso ya kgwedi le kgwedi.
Ha motho ya neng a kenya tjhelete letloleng a se a fumana tefo ho tswa Letloleng la Ditlhapiso tsa ho kula kapa ho tswa kotsi e bakileng hore a se kgone ho sebetsa bakeng sa nakwana kapa saruri.
Ha motho ya kenyang tjhelete letloleng a se a fumana dithuso ho tswa sekiming se seng se theilweng ka ho ya ka Molao wa Dikamano Mosebetsing.
Ha motho ya kenyang tjhelete letloleng a hloleha ho latela ditlhophiso tsa Molao.
Ha motho ya neng a kenyang tjhelete letloleng a emiswa hore a se fumane dithuso hobane a ile a tshwarwa a sebetsa mme a ntse a amohela dithuso kapa a ile a etsa bomenemene bo amanang le Letlole la Inshorense ya ho Hloka Mosebetsi.
Dithuso tsa ho Hloka Mosebetsi
Dithuso di balwa ho tloha mohlang o qalang ho tswa mosebetsing, empa di leshwa ho tloha nakong eo o entseng kopo ka yona.
Dithuso di leshwa feela ha ho hloka mosebetsi hoo ho le ka hodimo ho matsatsi a 14.
Dithuso di leshwa feela ha mosebetsi a ile a tebelwa ke ramosebetsi. Ha mosebetsi a ka tlohela mosebetsi ka boyena ha ho na dithuso tseo a tla di fumana, ntle le haebe ho tlohela mosebetsi hoo ho ka nkuwa e le ho bakilweng ke ramosebetsi kapa ntho e nngwe e itseng e utlwahalang.
Ha khampani e ka hloka ditjhelete tsa ho tswela pele ka mosebetsi, moo mosebetsi a ka fumana dithuso.
Motho ya kenyang tjhelete letloleng o tshwanela ho ingodisa ofising ya mesebetsi jwalo ka motho ya ntseng a batla mosebetsi ka ho ya ka Molao wa Ntshetsopele ya Bokgoni, wa 1998, hore a tshwanelehe bakeng sa dithuso tsa ho hloka mosebetsi. Motho ya kenyang tjhelete letloleng o tshwanetse ho ba le bokgoni le hore a fumanehe bakeng sa mosebetsi.
Motho ya neng a kenya tjhelete letloleng o tshwanetse ho itlaleha ka dinako le dibakeng tse tla behwa ke moofisiri wa ditleleime bakeng sa ho ya saena rejistara ya batho ba hlokang mosebetsi.
Motho ya neng a kenya tjhelete letloleng o tshwanetse ho fumana thupelo le dikeletso ka mesebetsi eo a ka ithutelang yona ha a laelwa jwalo ke moofisiri wa ditleleime. Ha motho eo ya neng a kenya tjhelete letloleng a hana ho etsa jwalo ntle le lebaka le utlwahalang, yena a ke ke a fumana dithuso.
Dikopo tsa dithuso di tshwanetswe ho etswa dikgweding tse 6 motho a felletswe ke mosebetsi.
Dikopo di tshwanetswe ho etswa diforomong tse etseditsweng hoo tse fumanehang ofising ya mesebetsi.
Dithuso di ka leshwa ho fihlela boholong ba matsatsi a 238 nakong efe kapa efe ya dilemo tse 4, mme hona ho tla itshetleha hodima dikrediti tseo motho a nang le tsona.
Dithuso tsa ho Kula
Dithuso di leshwa ho tloha mohlang oo motho a emisang ho sebetsa ka baka la ho kula.
Dithuso tse leshwang ke tse etsang phapang mahareng a tse leshwang ke ramosebetsi le tekanyetso e behilweng shejulung ya dithuso.
Dithuso di leshwa feela bakeng sa dinako tsa ho kula tse ka bang ka hodimo ho matsatsi a 14.
Dikopo tsa dithuso di tshwanetswe ho etswa dikgweding tse 6 tsa ho kula.
Kopo e tshwanetswe ho etswa foromong e etseditsweng hoo, e kenyeletsang ho tlatswa ha setifikeiti sa bongaka, ke ngaka kapa homeopath e amohelehileng. Setifikeiti sa bongaka se tshwanetswe ho tlatswa bakeng sa nako e nngwe le e nngwe eo ka yona ho entsweng tleleime ya dithuso.
Dithuso di ka leshwa ho fihlela boholong ba matsatsi a 238 nakong efe kapa efe ya dilemo tse 4, mme hona ho tla itshetleha hodima dikrediti tseo motho a nang le tsona.
Dithuso tsa ho ya Beleha
Dithuso di leshwa motho ya neng a kenya tjhelete letloleng ha a se a le moimana, ha a entse kopo.
Dithuso tse leshwang ke tse etsang phapang mahareng a tse leshwang ke ramosebetsi le tekanyetso e behilweng shejulung ya dithuso.
Dithuso di ka leshwa ho fihlela boholong ba matsatsi a 121 kapa dibeke tse 17.32 nakong efe kapa efe ya dilemo tse 4, mme hona ho tla itshetleha hodima dikrediti tseo motho a nang le tsona. Kopo ya dithuso tsa ho ya beleha ha e ame tokelo ya motho ya kenyang tjhelete letloleng bakeng sa dithuso tsa ho hloka mosebetsi, ha morao.
Ha motho a ka fosa mpa kapa a beleha lesea le kgathetseng, moo dithuso di tla leshwa bakeng sa boholo ba dibeke tse 6 ka mora ho fosa mpa/ho beleha lesea le kgathetseng.
Kopo e tshwanetswe ho etswa foromong e etseditsweng hoo e fumanehang ofising ya mesebetsi.
Kopo ya dithuso tsa ho ya beleha e tshwanelwa ho etswa dibekeng tse 8 tsa ho ima kapa dikgweding tse 6 ngwana a belehilwe.
Ke feela motswadi a leng mong ho bao ba adopthang ngwana ya ka etsang kopo ya dithuso.
Ngwana o tshwanetswe ho adopthiwa ka ho ya ka Molao wa Tlhokomelo ya Bana, wa 1983.
Nako eo motho a sa sebetseng ka yona e tshwanelwa ho sebedisetswa ho hlokomela ngwana.
Dithuso le leshwa ho tloha mohlang oo Lekgotla la Dinyewe le fanang ka taelo ya ho adoptha.
Dithuso tse leshwang ke tse etsang phapang mahareng a tse leshwang ke ramosebetsi le tekanyetso e behilweng shejulung ya dithuso.
Ngwana ya adopthiwang o tshwanetse ho ba ka tlase ho dilemo tse 2 boholo.
Kopo e tshwanetswe ho etswa foromong e etseditsweng hoo e fumanehang ofising ya mesebetsi.
Kopo ya dithuso e tshwanetswe ho etswa dikgweding tse 6 hang ho ba ho ntshwe taelo ya ho adoptha.
Dithuso di ka leshwa ho fihlela boholong ba matsatsi a 238 nakong efe kapa efe ya dilemo tse 4, mme hona ho tla itshetleha hodima dikrediti tseo motho a nang le tsona.
Dithuso tsa Bahlokomelwa
Dithuso di leshwa mohatsa ya setseng kapa molekane ya neng a phela le mofu ya neng a kenya tjhelete letloleng, ha ho ka etswa kopo.
Kopo ya dithuso e tshwanetswe ho etswa dikgweding tse 6 ka mora ho hlokahala ha motho eo ya neng a kenya ditjhelete letloleng.
Kopo e tshwanetswe ho etswa foromong e etseditsweng hoo e fumanehang ofising ya mesebetsi.
Ngwana ofe kapa ofe eo e leng mohlokomelwa a le dilemo tse ka tlase ho 21 boholo o na le tokelo ya ho fumana dithuso ha ho se na mohyatsa ya setseng..
Ha mohatsa ya setseng a sa etse kopo dikgweding tse 6, moo ngwana eo e leng mohlokomelwa a ka etsa kopo ya dithuso tseo, ha feela kopo eo e tla etswa matsatsing a 14 ka mora ho ba ho fete dikgwedi tse 6, tseo mohatsa a neng a lokela ho etsa kopo ka tsona.
Dithuso di ka leshwa ho fihlela boholong ba matsatsi a 238 nakong efe kapa efe ya dilemo tse 4, mme hona ho tla itshetleha hodima dikrediti tseo motho a nang le tsona.
Dithuso tse leshwang di tla lekana le dithuso tsa ho hloka mosebetsi tse neng di tla leshwa ha motho eo a ne a ntse a phela.
